Thlantlang Farhual Bo I Cuhnak Tuanbia;: Pu Chawn Kio||Job Liancin Thawng||

Thantlang khua a tlatu cu Mual Hlun le Hlawnching an rak si i,  Hlawnching nih an rak uk hna. A sinain Cinzah Mangpa fale cu an chuakcho i, mi an tei hna:  mi nih an ttih hna tikah a hnu ahcun ti le ram zong cu kan ti kan ram an ti cang. Cucaah cun Thlantlang khualu i a ummi Farhual zong kan mah ta an ti cang( atu Thlantlang khua hlun khualu ah khin farhual a hu tein a dawh ngaimi a rak um i cucu Farhual an rak ti). 

Cu Farhual cu Hlawnching pa nih keimah ta a ti i, Cinzah pa zong nih keimah ta a si a rak ti ve.  Cutik ahcun Hlawnching pa le Cinzah pa cu an i cuh i hna an rak hnok. Khua mi vialte cu a chim awk an hngalti lo i,  an Khua chung i miphun a ummi lak i mifim a simi paoh hna kha an i au i, cu upa hna nihcun Hlawnching pa le Cinzah pa i an Farhual hnahnawhnak cu bia an rak ceih hna.  Cu bia ceihtu cu (  Phunfing upa) an rak ti hna.

Bia an ceihtik ah Phunfing upa nihcun, ( Asi ahcun a hmunah kan kal lai i, nan arbawm thlaimi kan zoh lai, a hodah a thlai hmasa lai ti kan zoh lai,) tiah an ti hna.  Cutik ah cun arbawm cu an hmu lo sual lai ti phan ah a thliin arbawm cu zan ah an rak thai veve.  Hlawnching pa nih ka zum hna seh tiah arbawm thar te a lak i ttha tein a thlai. Cinzah pa arbawm thar zong cu a zaal manh ti lo i  innlak ah a kal pah in arbawm chia a lakpah i a va thlai ve.

A thaizing cu Phunfing upa hna nihcun an va zoh tikah Cinzah pa arbawm hi a tthin deuh caah a thlai hmasa a si lai an ti, ( Cinzah pa ram a si,) tiah bia an chah. Cuticun Thlantlang Farhual cu Cinzah ram a si lan. cu bantuk in hmailei ah bia hnahnok a um ahcun UPa pawl nih bia an ceih tawn caah bia ceih pawl cu ( Phunfing upa) an ti lan hna ( Phunfing timi cu, mah le miphun chungin a fimmi paoh pakhat cio i thlahmi kha a si.)

Cuticun Hlawnching le Cinzah cu an i do chin lengmang i ram zong cu an i cuh chin lengmang. Hlawnching pa cu mihlun deuh a si caah ram vialte cu ka ram a si a ti dih.  Nikhat cu Cinzah pa nih Hlawnching pa cu, ( Khua zeitiang dah na ram a si,) tiah a hal i,  Hlawnching pa nihcun Farhual bo cun a kaipi i, ( hi ka mithmuh tlangkulj vialte hi ka ram an si dih),  tiah a ti Marau tlang le Vuichip tlang kulh vialte hi a si dih tinak a si. Cucaah Cinzah pa nihcun, (a si ahcun, na mithmuh leng paoh hi ka ram a si,) tiah a ti. cucaah cun Vuichip tlang leng vialte cu Cinzah ram a si i, Cinzah nih ramkaupi an ngeihnak hi a si.

Note: Laimi Phun Thawhkehnak Tuanbia
           Pu Chawn Kio Tuanbia Chung Lakmi A
           Si.
Copy By: Job Liancin Thawng