THANGZANG KHUA TLAKNAK

THANGZANG KHUA TLAKNAK

Cuti cun Thlantlang khua ah cun Cinzah le Hlawnching cu an i do chin lengmang i, nikhat cu Cinzah Van Hulh le a Nau le nih Hlawnching pa Za Haal an velh i an thah sual. Cu tikah cun Hlawnching pawl vialte cu an thin a hung i, Lal Khar inn ah pumhnak an tuah i, Hlawnching vialte cu kan chuahnak Mangkheng ah kan kal dih lai tiah an rak ti. 

Cinzah pawl nih cun Mangkheng i an kal a si ahcun an kan chim lai i hna kan hnok lai an ti caah an tlaih hna i, sa- kal- kham cawpi in an rak rem hna ( Sa_ kal_ kham ti cu kal hlah u tinak i thlauhnak tinak a si). Asinain an rem khawh hna lo caah kal tthiamtthiam an i tim i, a donghnak ah Cinzah pawl nihcun latting( lanak) le lasen in lam an kham hna. Laiphung ahcun latting le lasen i lam kham hi cu a donghnak a si i, thihnak a si tiah an ruah caah Hlawnching pawl cu an rak i leet. 

Cutik ah cun Cinzah pawl nih Hlawnching pawl lung tthat lo cu an hngalh caah, " Thlantlang ah nan ngam ti ttung lo i, Zahnak tlangah khin khua va tla u," tiah an ti hna . Cuticun an kal i atu Thangzang khua khi an va tlak. Cinzah ram chungah khuatlaknak nawl an rak pek hna. 

Hlawnching pawl zong nihcun Thlantlang khua ah um cu an lung a tling ve ti lo caah an kal i, Atu Sihhmuh le Hmunlipi le Thangzang ram tonnak ah khin khua an va tlak i, cu khua cu " Khuatehau" an rak ti. Asinain khua a rem lo an ti caah Khuatehau cun an i tthial i atu Thangzang khua khi an tlak tthan. 

Cucaah cun Thangzang khua cu Thlantlang Cinzah nih an thah mi Za Haal nau pa Pa Awn nih a tlakmi a si i. Thangzang khua in Fungkah,Bungkhua le Hmunlipi khua hna khi an hei tlak chin hna. Hlawnching an kal cang caah Thlantlang khua cu Cinzah nih an uk lan hna.

Note: Kan khua tuanbia hi an tial ning a dang cio hna i a hmaan bik timi hi theih khawh a har ngai cang. Cucaah a theimi nih van ttial cio ulaw a tha tuk hnga. Hmailei kan fa nau le tefa hna nih theih le rel kan duh cio te lai caah.

THANGZANG KHUA THAR TLAKNAK KA VAN TTIAL THAN TE LAI. 

Palhmi um ai kun ka ngaithiam u law ka ruat thiam uh tiah zaangfah kan nawl hna.

Kai lawm

Nan Nau Lian Cin Thawng