Tlangrua Khua Tlaknak Tuanbia||Job Liancin Thawng||
Cu khua Rop cu a tu tiang a um rih i, "Rualhleng khua rop tiah an lan. Cu hna pawl cu an ttio hnuah Hakha khua chak Zaribual timi hmun hrawng le Nawinel hrawngah khin tlawmpal an rak um. Nawi tiva i "Rualhleng sum"timi zong khi cu lio hrawng i an um lio an nehnang a si.
Cu hna cu Hakha hrawng zongah cun um thai loin nitlak lei ah an kal tthan i Mualcin le Tinhlawng umnak Hlawngzaang khua cu an hung phan ve. Asinain Hlawnching le Mualhluan le Tinhlawng nih Thlantlang khua tlak awk ah an i tthial lio ahhin an sinah kal ve loin nitlak leiah an lan tthan i, a tu Tlangrua khua khi an va tlak. Cu lio cu AD 1500 hrawng si dawh a si.
Tlangrua khua ahcun Khilteeng nih cun an uk hna i khua an sa nain saral runvennak ah an hna a ngam ngaingai lo caah Phailenzawl i Cinzah Cong Phung hrin Lian Kual Falai pa Tin Luah cu bawi ah an hung put. Tin Luah cu Tlangrua ahcun a ra i a mah nih cun a uk hna.
Asinain Kilteeng le Rualhleng hi khua tla tu an si caah bawi le hrihruai tu zohin an zoh hna i, Khuachia rawlrel cu Tin Luah cu an pek. Tin Luah nih fapa a hrin i a pu min an khirh i Cong Phung an ti. Cong Phung nih Al Sang a hrin. Al Sang nih Phak Hlah le Khua Tlun a hrin hna. Phak Hlah nih Ttial Ling le Sun Zing a hrin hna i, Khua Tlun nih Thang Hlei a hrin. Thang Hlei nih Tin Kio a hrin i, Tin Kio nih Ral Uk a hrin.
Cinzah cu bawi ah an put hna caah an uk hna nain Kilteeng cu khua tla tu an si caah Cinzah he aa tluk tein an zoh hna. Tlangrua khua tla tu Lian Hlawng cu a rak lian tuk i, a cawzun le a siazun in nga a fuan tiah an rak ti.
Lian Hlawng nih Duh Mang le Hrang Chia a hrin hna i, Duh Mang cu Upa deuh a si caah Tlangrua cu a uk hna. Anau pa Hrang Chia cu mi ral ttha le mi tthawng a si caah Tlangrua ah um loin nitlak leiah a kal i Bualram khua tlatu a si.
Note: Lai Miphun Thawhkehnak Tuan Bia Pu Chawn Kio
Copy By: Job Liancin Thawng
Comments
Post a Comment