Thlantlang Khua An Tlaknak Tuanbia||Job Liancin Thawng||

Phailenzawl khua ah Hluan Sang nih a u Tio Hlei a thah caah cuka khua um cu an duh ti lo i, Mualzung khua ah kan i tthial lai an ti lio ahhin Mualhlun, Tinhlawng le Zinthoh pawl cu Mualzung ah kal loin Thihlum le Bawmlung pawl an i sawm hna i khua dang kan tla lai tiah Nithlalei ah an kal.

Timit le Titta an hei hrawn hnu ah Vankhamtlang an hung liam i, atu Thlantlang le Tlangrua kar lakah khin Hlawngzang khua ( Tlangbo khua ti zongah an ti) an va tlak. Cuka i an um lio ahcun Khilteng phun le Rualhleng pawl hi Hlawngzang ahcun an va phan ve i hmun khat ah khua an sa tti.

Hlawngzang khua ahcun an mah lawng saral runvennak ah a hna a ngam lo caah Phailenzawl ahcun an ra tthan i Hlawnching pa bawi ah an hung put. Hlawnching pa nih cun, "Asiahcun hi ka hi cu saral runvennak ah a hmunhma a that lo caah ralchan ah khin kan i thial lai," tiah a ti hna i Raciahva ral ahcun a tthial pi hna.

Raciahva ral ahcun khua an hung sa i, Tlanglau Leitak pawl an rak um cia nak a si caah Thlantthing an hmuh i, "Aho hmanh um bal lonak hmun ah kan um rua kan ti i, mi thlantlang ah pei kan um ko hi, " an ti. Cucaahcun cu khua cu "Thlantlang" tiah an ti.

Thlantlang thate i an um hnu ahhin, Phailenzawl i Cinzah pa Cong Phung fa Lian Kual nih fapa panga a hrin hna i, upa pathum hna cu Khuathar tlak awk kan kawl lai tiah an i thawh. Tiphul khua in Mangkheng Hlawnceu bawi Ral Hnin sinah an vung phan i, Ral Hnin nih kei mah nih kan tlakpi hna lai a ti hna.

Nitlak leiah an vung kal i Thlantlang khua hlun i Cawmpi Tikhur khi a hung huahpi hna. Cu ka hmun cu Hlawnching le Mualhlun nih cun khua cu an rak tla cang nain Ral Hnin cun an ttih caah an thawl ngam hna lo i a fonh tuin an i fonh.

Cuticun Thlantlang khua cu Ral Hnin he cun an tlak ti i, tha tein khua an sak hnuah Ral Hnin cu an khua Mangkheng ah a tlung. Cutikah Thlantlang nih Ral Hnin cu kum thum ah siapi pakhat lengmang an pek. Cucaah Mangkheng nih Thlantlang cu kan khua te an si tiah an rak ti, an ti.

Thlantlang khua cu Raciahva ral timi hmun ahcun khua an sa i Thlantlang khua hlun ahcun kum 450 tluk khua an sak hnu ah kum 1961 ah a tu Thlantlang khua thar ahkhin an i tthial. Khua ttha tlak hnuah"Thlantlang" ti cu min ttha lo a si an ti caah an duh ti lo i, 15.7.1980 ni in "Thantlang tiah an thlen. "Than"timi cu mithan tinak a si i, "Mithannak Tlang"tinak a si, an ti.  

Note: Lai Miphun Thawhkehnak Tuanbia Pu Chawn Kio Cauk i lakmi a si.

Copy By: Job Liancin Thawng