Palm Sunday|| Jerusalem Ah Sunglawi Ngaiin Jesuh A Lut||

Jerusalem khua kha an hei naih cang; Oliv Tlang i a ummi Bethfeih khua kha an phak in Jesuh nih a zultu pahnih kha hmaiah a hei thlah hna i, “Nan hmai khua ah khan rak kal u law laa pakhat aa hrengmi nan hmuh lai i cu laa sinah cun a fate kha a um lai.

Cun nan phawih hna lai i ka sinah nan ratpi hna lai. Mi nih zeimaw tiin an in ti hna ahcun, ‘Kan Bawipa nih a herh,’ tiah nan ti ko hna lai i an in lakter ko hna lai,” tiah a ti. Cucaah a zultu kha hmaiah cun an rak kal i Jesuh nih a chimh hna bang khan an tuah.

Laa le a fate kha an ratpi hna i an puan kha an danh hna i Jesuh cu aa cit. Mi tampi nih an puan cu lam ah khan an phah hna i a cheu nih thingnge kha an sam hna i lam ah cun an phah ve hna.

A hmai i a kalmi hna le a hnu in a zulmi hna cu an bu ning piin an au i, “David Fapa cu thangòhat ko u! Bawipa min in a rami cu Pathian nih thluachuah pe ko seh, Pathian cu thangòhat ko u,” tiah an ti.

Jerusalem khua chungah an va luh tikah a khuapi in an i tuai i, “Hi pa hi ahodah a si?” tiah mi nih khan an rak hal hna i, “Hi pa hi Galilee ram Nazareth khuami profet Jesuh a si,” tiah mibupi nih khan an leh hna.

MATTHAI 21:1‭-‬3‭, ‬6‭-‬11

Relchih Dingin A Peh
A Peh 1. Lam ah puan le thinghnah an phah piak. Hi lio caan ah “puan” hi anmah minung ai ah ruah a si i Jesuh kalnak lam ah an phah piak tikah na minung kan si, ti an langhternak a si.

Tahchunhnak, Biakam Hlun ah Jehu siangpahrang kha mipi nih an puan an rak phah piak (2 Siang 9:13). Cun “thinghnah” hi Pathian biak dingah an kal tikah an i ken tawn. Atu cu an ken sawhsawh si loin Jesuh caah lam ah an phah.

Apeh 2. Jesuh cu mi tampi nih an zulh i “Hasanna! David Fapa cu thangtthat ko u!” tiah an au. Hosanna timi hi Greek holh a si i, Aramaic holh an lehchinmi a si. Aramaic ahcun hosa‘na ti a si. Cu zong cu Hebru holh in an i lakmi a si i, Hebru ahcun hosi‘a-na ti a si.

A sullam cu “Kan khamh tuah!” tinak a si. Asinain, Jesuh chan a phanh tikah cun, “thangtthat u!” ti sullam an ngeihter cang. David fapa cu thangtthat ko u! Bawipa min in a rami cu Pathian nih thluachuah pe ko seh! Pathian cu thangtthat ko u! tiah mipi cu an au.