Profet Joel Tuanbia||Job Liancin Thawng||

                  Profet Joel Tuanbia

Joel hi B.C kum zabu 9 lio ah Judah pennak pahnih ah Profet rian a rak tuan, Siangpahrang Uziah nih a uk lio B.C kum 820 hrawngah a cauk kha ttial hram a rak thok, Jonah le Amos cu Joel he chanchan khat ah a nung ttimi Profet an si. Profet Joel hi Pethuel Fapa a si. 

Mah hi Joel cauk ahhin Dal 3 a um i mah chungah hin Pathian, Bawipa ni a neihnak ni aa tlaiin ralrin nak a kan pek. Dal khatnak le Dal hnihnak ah Khaubok run nih ram an hrawh dih cikcek nak kong le mangttam a tlun lai nak kong a tel. Mah hi khaubok hi Chiandeih (Lion) bantukin Ha an nei i rang bantukin an tli, cun Ral hau cungah a kaimi ralkap bu bantuk an si i raltuk nakah a kalmi rangleng bantukin an thong a thang. 

Jerusalem le Judah ah a hmaan lomi biaknak cu a karh chinchin ko nain Pathian nih cubantuk cu a onh lo i a duh lo. I ngeihchih in Pathian sinah an kir longah Judah mi hna nih ruah channak an ngei kho lai. Lamkaltu Paul nih Bawipa min a aumi paoh cu khamh an si lai ti ah Joel bia kha a chim than. Pathian min auh ti tikah, amah hngalh, zumh, a mah nawl ngeih le a duhnak tuah kha pakhatnak ah aa tel.

Dal 3 nakah Pathian miphun a hrem tu miphun dang kong a langhter. An nih cu misur bantukin nen an si lai. Cun Pathian nih a pennak kha hmangin hmai lei ah Thlarau lei he Pumsa lei he thluachuah kan pek hna lai tiah bia a kan kamh. Van le vawlei ah a ummi vialte hna nih lungrual tein Pathian an biak lai. 

Joel bible kan rel tikah an mah le an mah Pathian ral aa si termi hna hrawh an sinak kong. Cun a ngaichih i Pathian sin a kirmi hna nih tthatnak an hmuh nak kong le Pathian pennak kong thanh awk ah Joel nih a rak chimchung mi bia a tlinnak kong hi i chin chiah. 

Judah mi hna nih pathian dang an biak i Sertu Pathian an serhsat i hnu an chit tak i Izipt ramin a chuah pitu hna Pathian kha an hlawt caah Pathian nih voi tampi a hrem hna, sal ah a taan ter hna i hremnak a phunphun an rak tuar.

Bawipa Nih Ngaihchih A Fial Hna

““Atu zong hmanh ah hin, nan lung tak tein i ngaihchih u law, rawl kha ul u law òap u law nan òang i cum tuah u. Nan puan si loin nan lung tu kha thlek tuah u,” tiah Bawipa nih a ti. Bawipa nan Pathian sinah cun ra kir òhan tuah u, Amah cu zaangfahnak le vel a ngeimi a si; Amah cu a thin a fual i a biakamnak kha a zulmi a si; Ka tlunter lai tiah a timi harnak kha leet i ngaihthiam awk tu ah aa tim zungzalmi a si.  

Bawipa kan Pathian nih cun harnak ka tuah lai a timi kha a hei leet òhan ko hnga i a hei i ngaichih ko hnga i a hnuah thluachuahnak a hei kan chiahtak ko hnga dahkaw, Cu tikah cun kannih nih rawl le mitsur hang thawinak kan pekchanh khawh ve ko hnga. Zion ah muko kha tum tuah u, Rawl ulhnak kha thanh u law biaknak pumhnak kha au tuah u.

Bawipa rianòuantu tlangbawi hna kha innleng le biakòheng karah khan dir hna seh law òap hna seh law, “Maw Bawipa, na mi, nangmah na mi hi run kan zoh tuah; Miphun dang nih capo ah an kan ser i, ‘Khuazei ah dah nan Pathian cu a um kun?’ an kan ti nakhnga lo, Ningzahnak ah cun kan phakter sawh hlah,” tiah ti hna seh.”

JOEL 2:12-15, 17 

Israel Cu Ngaih Thiam A Si

“Khi tikah Bawipa nih a ram kha a zawn a ruah i a mi hna cungah zaangfahnak a ngeih kha a langhter. Annih nih an nawlnak kha a leh hna i, “Atu cu rawl le mitsur hang le chiti kha kan pek hna lai i khim tein nan um lai; Miphun dang nih nannih cu an in serhsat ti hna lai lo. 

 Chaklei in a rami òihnung cu nan sinin lam hlapi ah ka òhial lai i a ro i a carmi ram ah ka dawi lai, An hmaisuang pawl cu Rili Thi ah ka thlak hna lai i an hnudawn pawl cu Mediterranean Rili ah ka paih hna lai, Cun an ruak cu a thu lai. Hi thil hi zeicahdah ka tuah ti ahcun, nanmah cung i an tuahmi ruangah khan a si.

“Nannih Zion mi hna, Bawipa nan Pathian cungah i lawm u law nan tha nuam tuah u, Amah nih fur ruah cu a za tawk tein an pek hna, Khuasik caan ruah kha a surter i òhal caan ruah kha hmasa bantukin a ratter.

Atu cu ei awk tampi nan ngei cang lai i nan khim cang lai. Nannih nan caah khuaruahhar thil a tuahtu Bawipa nan Pathian kha nan thangòhat lai. Ka mi cu zawmhtaih nan si ti lai lo. Khi tikah Israel, nangmah nih na sin i ka um kha na hngalh lai i Pathian dang si loin, Bawipa keimah cu, na Pathian ka si kha na hngalh lai. Cun ka mi cu ningzahnak nan ing ti lai lo,” tiah a ti.” JOEL 2:18-20, 3, 26-27

Miphun Dang Cungah Pathian Biaceihnak

““Tair le Sidon le Filistia ram vialte hna, ka cungah zeidah tuah nan i timh? Ka tuahmi kha cham nan ka timh maw? Nan ka timh a si ahcun khulrang in keimah nih kan cham hna lai! Nannih nih ka sui le ka ngun le ka hlawn sungsung kha nan biakinn ah nan kalpi hna. 

Judah ram mi le Jerusalem khuami kha anmah ram in a hlatnak ah nan kalpi hna i Grik mi sinah nan zuarh hna. Atu cu nan zuarh hnanak hmun chung khan ka kirpi òhan hna lai. An cung i nan tuahmi kha nan cungah ka tuah lai. 

Nan fapa hna le nan fanu hna cu Judah ram mi hna sinah ka zuarh hna lai i annih nih lamhlatpi i a ummi Sabean mi hna sinah an zuarh chin hna lai, tiah Bawipa nih a ti.””

JOEL 3:4-8

Pathian Thlarau Peknak

““Cun cu hnuah cun, mi vialte kha ka thlarau ka toih hna lai i Nan fapa hna le nan fanu hna nih ka bia kha an chim lai, Nan tar hna nih mang an manh lai i Nan tlangval hna nih langhnak an hmuh lai. Khi ni ah cun, salpa hna le sal nu hna hmanh kha, ka thlarau ka toih hna lai. 

“Cu ni a rat lai nakding hmelchunhnak hna cu van le vawlei ah ka langhter hna lai: Thisen chuahnak le mei le meikhu tlangtlang an si lai. A lian a ngan i òih a nungmi ni, Bawipa ni cu a phak hlanah, Ni cu a mui lai i thlapa cu thisen bantuk in a sen lai. 

“Sihmanhsehlaw Bawipa kha bawmhnak a halmi paoh nih khamhnak an hmuh lai. Bawipa nih a chim bangin, Zion Tlang cungah le Jerusalem khuachung ka khatkhat ah, a luatmi hna cu an um lai. Bawipa nih a thimmi hna cu an nung lai.”” JOEL 2:32

Joel kong thawngtha nih a chim duh bikmi cu Pathian duhnak tuah le a nawl ngeih i zulh hi a si ko. Cucaah kan nih zong nih Pathian nawl kan ngeih i a duhnak kan tuah khoh ve nak hnga kan sualnak le kan palhnak cu hnuah chiain Pathian sinah kir usihlaw, Thluachuah kan hmu lai i kan hna a ngam lai. 

Amen Amen Amen

Job Liancin Thawng