Dar Rul Kong||Job Liancin Thawng||

Dar Rul Kong

“Hor Tlang in, Edom ram kha hrial awkah Rili Sen lam kha an tlaih i lam ah mi hna cu an ing a puang.”

Khi cu rul taktak nih tung a ngerhmi a lo maw? Rul taktak cu a si lo. Hi rul cu dar in sermi a si. Mi hna nih an zoh i an dam khawh nak ding caah mah rul kha tung cung ah tar tuah tiah Pathian nih Moses kha a rak chimh. Sihmanhsehlaw vawlei cung i a ummi ruldang pawl hi cu rul taktak an si. Mi kha an cuk hna i an zawt ter hna. Zeicahdah a si ti nan hngal maw?

Israel mi hna nih Pathian le Moses ralchan in bia an chim caah a rak si. Annih nih: ‘Zeicahdah hi ramcar chung i thih awk ah hin Izipt ram in nan kan chuahpi? Hika ah cun rawl a um lo, ti a um lo. Cun hi manna changreu zong hi kan ei duh ti lo,’ tiah an zai.

Asinain manna cu rawl ṭha ngai a si. Khuaruahhar ṭhawnnak in Pathian nih a rak pekmi hna a si. Cun khuaruahhar ṭhawnnak in ti zong a rak pek fawn hna. Sihmanhsehlaw hi bantuk in Pathian nih a zohkhenhnak hna kha annih cu i lawmh awk an hngal lo. Cucaah Pathian nih hi sivai ṭhalo a ngeimi rul kha Israel mi pawl dantatnak ah a rak thlah. Rul nih cun a cuk hna i mi tampi cu an rak thi.

A donghnak ah mi hna cu Moses sin ah an ra i: ‘Pathian le nangmah kha kan in mawhchiat hna caah kan sual cang. Atu cu kannih sin in Rul kha a lak hna nak hnga Pathian sin ah thla cam tuah,’ tiah an ti.

Cucaah Moses nih mi hna caah cun thla a cam. Cun Pathian nih Moses cu hi dar rul kha ser tuah tiah a rak ti. Rul nih a cukmi hna paoh nih an zoh khawh nakhnga tung cung ah a tar ter. Moses nih cun Pathian nih a chim bang in a tuah. Cun rul nih a cukmi hna nih cun dar rul cu an zoh i an dam ṭhan.

Jesuh Le Dar Rul

“Moses nih dar rul kha thetse ram lakah a tar bantuk khan Mi Fapa zong hi tar a si ve lai. Cucaah cun amah a zummi paoh nih zungzal nunnak an ngei lai. Cuticun Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”

JOHAN 3:14-16 

Hi thil thawng in fimnak pakhat lak awk a um. Kannih vialte cu khi rul nih a rak cukmi Israel mi hna bantuk in, lam pakhat cung ah kan um ve. Kan zapi tein a thi khomi phun kan si dih. Nan pawngkam vialte hi zoh hmanh u law, mikip an tar, an zaw i an thih nan hmuh ko lai.

 Hi cu hmasa bik mipa le minu Adam le Evi nih Pathian kha hnu an chit i, kannih vialte cu an fale lawngte kan si caah a si. Asinain Pathian nih zungzal in kan nun khawh nak ding ah lam pakhat a kan tuah piak cang.

Pathian nih a Fapa, Jesuh khrih kha vawlei ah a run thlah.

 Jesuh cu mi tampi nih a ṭhalo tiah an rak ruah caah thing cung ah thlai a rak si. Sihmanhsehlaw Pathian nih kanmah khamh awk ah Jesuh cu a kan pek. Amah kha kan zoh i, amah kha kan zulh ah cun, zungzal nunnak kan hmuh khawh lai. 

Nambar 21:4-9; Johan 3:14, 15.

Biahalnak hna

• Hmanthlak chung tung i aa ngerhmi hi zeidah a si i, Pathian nih mah kha tar awkah zeicahdah Moses kha a rak chimh?
• Pathian nih an ca i a tuahmi vialte caah mi hna nih zeiruangah an i lawmh lo?
• Pathian nih sivai a ngeimi rul in dan a tat hna hnuah mi hna nih Moses kha zei tuah awk dah an nawl?
• Zeicahdah Pathian nih Moses kha dar rul a serter?
• Mah tuanbia in zei cawn awk dah kan i lak khawh?